الشعر العامي المنغم
((شعر الموضوع))
حـبــيـــب
وخجــل وشـــرف
ـــــــــــــــــــ
لينـا وقت بـنـدوروا على حـبـيـبْ.........وبعـد ثعـب لاقـيــنـاهْ
كيف ماخيــالي أمصوره تقـريـــب........وإحنا في الحلم ريناهْ
جميل الوجه ومضحك كما الحليبْ........وسمحات كل أعضاه
جبينه شمس ضاوي قـريب إيغـيب.......وحاجبه الشهر شفناه
حبـيبي أمــــرادع كامل الترتــــيب........وكـيف ماتصـورنـاه
وانا ويــن ما شفـــته حسّيت لهـيب.......واتـْنـهدت قلتــها...آه
آه..يا إمنايا القـلــــب دار وجـيـب........والعـقـل راح إمعــــاه
وزعـم قـال ها الغزال فيه نْصِيب........والا صعيب إرجـــاه
وزعمه هـُـو ما دَارْ عمـره عــيب........وهكـي تـوقـعــنــــــاه
يرضى ومنـِّي إيدير ليه حــــبيـب........والا يـبـي نـنــســــــاه
وخاطْرِي عـدَّى سَرَحْ في الغـيـب........إنخمُّـمْ في كيف لِــقاهْ
شن نقـوللّه تعالى أخطبني عــيـب........وما إيصـحـلي نـبـــداه
وإيقـولوا الراجل هوّا اللي بيجـيب.......ورْده ويقول إسمــــــاه
والبنت حشمه وشورها التحجـيب........وحبـيبها إتـلبي إنــــداه
إتكون لابسه ملبوس سمح عجيب.......وراسهـا عليه أغـطــاه
وأنا واتـْيَه وحبـّي إحداي قــريب........وينطـق أنكون أحــــداه
لي وقـت ليــه إمـــدايْــره ترتيب.........وفـكري يـبـي يـبــــداه
لكن أمنـين أنشوف نلـقى عـ.يب.........الشـاب البـنـت تــبـــداه
مـرّات يصفعها إبْكَـفْ لهــــــيب.........وفي القـلب يقـعــــد داه
ومرّات يخدعـها بالسان رطيـب........وتـــركب وتمشي إمعاه
هِـيّـا بـْنِــّيتـْها إتـــــريد حـبـيـــب.........وهـو داهـيـــة تـلـقـــــاه
ســوق الغـرام أمـخـربه تخريـب.........وهــَـاذايْ هـو مــبـْـــداه
وهو ما عرفْ الحب دارحبـيـب.........بنت أوْ شاب من نـــدّاه
وانا فاهــمـاته كــل ها السريب.........وتــو نعـرفه مسعــــــاه
أنـا بـوي ها اللي تـوْرَاسه شيب ........يا ما قـعــدت إمـعـــــاه
وحاكيلي حكاوي إيه شي عجيب........وعن كل شيء سألنــــاه
ويـقــــول ما تتحشمـوا وإيجـــيب .......على حبيبته ومــشـكـــاه
أمنا اللي في وين عنها إيغــيــب........عـطّـَّـلْ أبــــوكـــــم ـ لاه
وتـبقى إتزازي إتقولشي باتجيب........واحـنا سرها إعـرفنــــاه
من بوي هللِّي في الْغــاه عجيب........وعسلـه إحنــا ضقـنــاه
عن كل شيْ إيخبرك في سـريب........وإيقولـّكْ أدروس حـيــاهْ
واحْكاويه ريحتـها مثيل الطــــيب........لـمـْريـِّضْ إتـْخـَـفـّف داه
وهذا اللي أمخـلـِّي العقل ما يْسيب........طريق جـدْ لـَهْ وُ جـداه
ودايرإفـْخشْمي إخزام وين إتـْخيب........نفـْــسي إيكـــــرْ قـــــداه
انحس الوجع كيف توْ في الترتيب.......ونرفض المشي إمـعـاه
هذا علاش ما قدرتش إندير حبيب.......والغــلــط نـمــشي وراه
والحـب لاهو حرام لاهــو عـــيب .......بــس هـُـو لـَـهْ مَــقـْــدَاهْ
وصيُّورها تـفراج يا سِي شـْعـيْب........وقـسْــمـِي أنـــا نـلـقـــاه
والحـمـد لله ولــو ظفـرنـا الشـيـب........إحْنا شَرَفـْـنـَــا أحْمـَـــــاه
ـــــــــــــــــــــــــــــــــــــــــــــــــــ
منيرتاج الدين منير
ــــــــــــــــــــــــ
السيلاوي..الغريفة
السبت سبتمبر 15, 2012 9:24 pm من طرف منيرتاج الدين
اليومية
