حب وخجــل وشـــرف
ـــــــــــــــــــــــــــــــــ
لينـا وقت بـنـدوروا على حـبـيـبْ.........وبعـد ثعـب لاقـيــناهْ
كيف ماخيــالي أمصوره تقـريـــب........وإحنا في الحلم ريناهْ
جميل الوجه ومضحك كما الحليبْ........وسمحات كل أعضاه
جبينه شمس ضاوي قـريب إيغـيب........وحاجبه الشهـر شفناه
حبـيبي أمــــرادع كامل الترتــــيب........وكـيف ماتصـورنـاه
وانا ويــن ما شفـــته حسّيت لهـيب.......واتـْنـهدت قلتــها...آه
آه..يا إمنايا القـلــــب دار وجـيـب........والعـقـل راح إمعــــاه
وزعـم قـال ها الغزال فيه نْصِيب.......والا صعيب إرجــــــاه
وزعمه هـُـو ما دَارْ عمـره عـيب........وهكـي تـوقـعــنـــــاه
يرضى ومنـِّي إيدير ليه حــــبيـب........والا يـبـي نـنــســـاه
وخاطْرِي عـدَّى سَرَحْ في الغـيـب.......إنخمُّـمْ في كـيف لِــقاهْ
شن نقـوللّه تعالى أخطبني عيـب.......وما إيصـحـلي نـبــــداه
وإيقـولوا الراجل هوّا اللي بيجيب.......ورْده ويقول إسمـــــــاه
والبنت حشمه وشورها التحجيب........وحبـيبها إتـلبي إنــــداه
إتكون لابسه ملبوس سمح عجيب.......وراسهـا عليه أغـطـــاه
وأنا واتـْيَه وحبـّي إحداي قريب........وينطـق أنكون أحــــداه
لي وقـت ليــه إمـدايْــره ترتيب........وفـكري يـبـي يـبــــداه
لكن أمنـين أنشوف نلـقى عـيب........الشـاب البـنـت تــبــــداه
مـرّات يصفعها إبْكَـفْ لهــــيب.........وفي القـلب يقـعـــد داه
ومرّات يخدعـها بالسان رطيب........وتـــركب وتمشي إمـعاه
هِـيّـا بـْنِــّيتـْها إتــريد حـبـيـــب........وهـو داهـيـــة تـلـقـــــاه
ســوق الغـرام أمـخـربه تخريب........وهــَـاذايْ هـو مــبـْــداه
وهو ما عرفْ الحب دارحبـيـب.........بنت أو شاب من نـــدّاه
وانا فاهمه ها الشيْ وها السريب........وباش نعـرفه مسعـــــاه
أنـا بـوي ها اللي تـو راسه شيب........يا ما قـعــدت إمـعــــاه
وحكالي حكاوي إيـه شي عجيب........وعن كل شيء سألنــــاه
ويـقول ما تتحشمـوا وإيجــــــيب .......على حْبيبته ومــشـكــــاه
أمنا اللي في وين عنها إيغــيــب........عـطّـَّـلْ أبــــوكـــــم لاه
وتـبقى إتزازي إتقـــولشي باتجيب........واحـنا سرها إعـرفنـــاه
من بوي هللِّي في الدروس غريب........وعسلـه إحنــا ضقـنــاه
عن كل شيْ إيخـبرك في ســريب........وإيقولـّكْ أدروس حـيــاهْ
واحْكاويه ريحتـها مثيل الطــــيب........لـمـْريـِّضْ إتـْخـَـفـّف داه
وهذا اللي أمخـلـِّي الْعقل ما يْسيب........طريق جـدْ لـَهْ وُ جــداه
ودايرإفـْخشْمي إخزام وين إتـْخيب........نفـْــسي إيكـــــرْ قــــداه
وانحس الوجع كيف توْ في الترتيب.......ونرفض المشي إمـعــاه
وهذا لاش ما قدرتش إندير حبيب.......والغــلــط نـمـــشي وراه
والحـب لاهو حرام لاهــو عــــيب ......بــس هـُـو لـَـهْ مَــقـْــدَاهْ
وصيُّورها تـفراج يـا سِي شـْعـــيْب........وقـسْــمـِي أنـــا نـلـقـاه
والحـمـد لله ولــو ظفـرنـا الشـيـب........إحْنا شَرَفـْـنـَــا أحْمـَـــاه
ـــــــــــــــــــــــــــــــــــــــــــــــــــ
منيرتاج الدين منير
ــــــــــــــــــــــــ
السيلاوي..الغريفة
السبت سبتمبر 15, 2012 9:24 pm من طرف منيرتاج الدين
اليومية
